La pruma braba

 
- Ui que bien falou ltiu!
- I anton quei dixo?
- Sei alhá quei dixo?
 
(Cumbersa oubida na Tierra de Miranda)
 
 
Hai fincones a arder anquanto l riu drume la séstia,
La calor ye tanta que ls uossos yá píden sossego;
Búscan las selombras para arramar la sue canseira.
Las canhonas zeínhan nuobielhos de lhuç,
Anquanto ls freznos zmáian delantre deilhas.
Mas nun podemos çquecer que l nuobo modelo strutural i de zambulbimiento oubriga a ua análeze de las scuolhas de zambulbimiento feturo. La prática amostra que l’amprecípio de l programa de formaçon d’atitudes facelita la definiçon de las oupeniones de partecipaçon giral.
Por isso, nunca ye demais anxistir que ls recursos andógenos i la realizaçon deste projeto mos oubriga a potenciar aquilho que ye nuosso. Todos ls studos que tenemos cúmpren un papel mui amportante pa las nuossas metas. Nun podemos çquecer, i queremos repisar bien esta eideia, que l’actual strutura ourganizatiba i funcional fui ardada de l passado, sien que puodamos fazer grande cousa.
Outro lhado neste cuntesto ye aquel que splicitamente mos ampurra pa la mesma buraqueira, adonde s’abístan ls garunhos. De l memo modo, an termos d’análeze, l nuobo modelo strutural eiqui defendido ajuda pa la correta i cierta determinaçon de las nuobas propuostas.
La prática, diç-mos que l zambulbimiento de formas çtintas d’atuaçon assume amportantes posiçones na definiçon de scuolhas básicas pa l éisito de l programa. Tenemos ls nuossos alheçaces porfeitamente defenidos. Son trés ls pilares que queremos zambulber: l purmeiro, l segundo i l terceiro.
Nunca ye demais repisar que ye mui amportante este spargir de las sinergies, i que l nuosso deseio ye facelitar la definiçon d’un nuobo sistema i de las cundiçones de zambulbimiento feturo.
La prática diç-mos que l zambulbimiento ten ua bertiente neste cuntesto de las scuolhas de ls predutos andógenos. La speriéncia amóstra-mos tamien qu’estes recursos andógenos son ls que bénen de drento i sabendo isso facelita la defeniçon de ls nuossos sistemas de produçon.
Ye amportante fazer subressalir que l’análeze de ls resultados oufrece ua ouportunidade de berificaçon de ls andíces de negócios. L stímulo a l’ampregabelidade ye l’amprecípio de la formaçon qu’acarreta las formas de star.
Assi i todo, stamos nun camino de spargimiento i de zambulbimiento de la nuossa tierra, que ye un processo demorado, adonde la cunsolidaçon de las struturas i de ls trés eixes antes einumerados ye mui amportante.
Por último, mas nó menos amportante, ye l çtacar que l trabalho an rede, ne l cuntesto de l processo an que mos ancuntramos, ye tan amportante cumo l restro de todo l qu’eiqui dixe.
Tengo dito.