La pruma braba
Yá chube l sol cun miedo l cielo arriba,
Nun ye clara la lhuç cumo era dantes;
La chelubrina nun anda yá tan biba,
I nun ándan ls rapazicos de musicantes.
Pareç que l’alegrie destas preinadas
Se trocou por nubricas anegradas
Pa de lhuito bestir la natureza.
António Maria Mourinho, Nuossa alma i nuossa tierra
Chegou Outubre. Cun el chégan ls purmeiros frius. Las nuites son mais grandes, ls dies mais pequeinhos. La tierra bai-se purparando para recebir l Eimbierno. Assi se bai amostrando l buraco fondo adonde chegaremos an Dezembro,quando ls dies fúren inda mais pequeinhos i las nuites mais grandes.
Acabado la calma stibal, cerrado l tiempo de las praias i, cun el, l tiempo de ls ancéndios, acénden-se las tchamadas doutras guerras. Las políticas, por eisemplo, i tamien de la bola que, abençoada seia, acaba por ser la mais saludable de todas eilhas. Deiqui a pouco yá haberemos çquecido las letras i las cantigas qu’animórun l Berano. Ye cumo se l paiç beilasse al cumpasso de las staçones. Mas anquanto la gritarie se bai oubindo, traendo pa las purmeiras páginas las fantasmas, riales sou nó, de mais ua crize política, de las alicantinas que mánan i reçúman por esse mundofuora, hai outro paiç i outro mundo calhado, carrancudo, cun miedo de l sou feturo i subretodo sien acraditar na capacida de ls que mándan i grítan.
An fin de cuntas, l cumpasso de las staçones ye l pouco que queda d’ua berdade clara i lhimpa antre la rialidade sterior i l nuosso sentir. L restro cada beç parece culado por aranheiras ambisibles que úrden l die a die cun telas que nun cuorrespónden a la urdideira rial. Antre eilha i aquilho que mos dízen hai ua falta de sintonie tal, cumo quando no cinema aquilho que se bei nun bate cun aquilho que bemos. La berdade ye que l técnico de sonido nun stá tonto. Recibe i cumpre órdenes d’outros que, por séren ancapazes de fazer l sou trabalho, aplícan a la rialidade palabras d’un çcurso que nun le pertence.
Cumo na lhiteratura, l paiç bibe ua spécie de duplicaçon specular, an que ls fuolhetins s’aliméntan de la bida rial, ls berdadeiros dramas sociales feitos telenobela social, feita de mintiras, manhosamente serbida pu la diplomacie mediática.
Na Tierra de Miranda inda hai staçones, i tiempo i renuobo. Hoije nada ye cumo onte, mas Clio inda nun cortou l filo que mos une al nuosso passado. Por isso, cun l friu, chegaran ls purmeiros lhumes i l sou fumo anrósca-se al nobielho adonde yá stan debanados outros tiempos i outras eras. Datrás, no més d’Outubre, era tamien quando s’ampeçában las fogueiras. Mas era an cada rue, na cada cabanhal, que s’ajuntaba la giente, cada un lhebabando un feixe de lheinha i para acender las fogueiras al redor de las quales la giente se sentaba. Uns cuntában cuntas i outros, subretodo las ties, filában. Lanha i lhino era l que mais salie de las ruocas i de ls fusos.
Mais para lantre fazien-se uas carneiradas. Matába-se un carneiro bielho i todos comien i buien al redor de l lhume. Ls nuobe meses d’Eimbierno i três d’Eimfierno, cumo diç l adaige, marcórun l tiempo i l home destas tierras. Nestas fogueiras rituales cumbóca-se l fogo criador, fuonte de bida, qu’acalece, oussilia i acunchega. Por isso, estes lhumes nun son solo naturales. Son eilementos simbólicos, bien fondos, al redor de ls quales nácen i se spárgen outras fuorças donde se coálhan i gánhan cuorpo ls miedos i ls temores, mas tamien l’ounion que ganha mais fuorça al redor de las lhabaredas.
Chega l Outonho. Ye tiempo de cerrar puortas i ginelas i d’asperar qu’algua fuolha, aire fresquito ou friu, quien sabe s’ua farrapa de niebe, mos çperte de l suonho stibal, doce ou amargoso, an que stábamos metidos.
