A opinião de ...

Agora bamos pa l fondo de l poço.
(Adaige mirandés)

Chegou l Eimbierno. Las nuites son grandes. Ls dies pequeinhos. L friu tchama la giente pa l redor de l lhume. L sol quaije nun se bei , amenaça scunder-se i nun tornar. Bamos pa l fondo de l poço. Ye l absedo de l tiempo i de la bida.
Ye por alturas que por muitos lhugares de l Nordeste Stramuntano, i tamien na Tierra de Miranda, sálen a la rue figuras stranhas i terribles, que mos chégan de l fondo de ls tiempos. Son manifestaçones que mos traspórtan para tempos mui antigos, an que las gientes bibien cerradas an sous paradigmas ancestrales, anraízadas i angudadas de crenças mágicas i naturalistas. I todo esto se passa durante l tiempo an que se festeija la muorte de l sol i de la natureza – la fin de l mundo simbólica, l fondo de l poço – naqueila paraige criadora an que l’órden stá detenida i de que l tiempo natalício hardou muitas i muitas culidades. Gresgas, bózios, çfeitas, roubos rituales, ambasones de propriedades, lhuitas a fazer de cunta i posturas de refustedo, cumpónen paradigmas de comportamientos subarsibos i, quantas bezes, çclaradamente eizorcísticos. Las máçcaras demonhíacas que lhieban i cun que s’andónan, las munadas zambargonhadas, ls bózios atormentadores i la tradicional fuorça i agressibidade cun que maniféstan, son la marca mítica de l caos, pai de la dezórden, de la rebirabulta mais cumpleta, mas tamien de la fuorça criadora.
L purmeiro a mostrar-se ye l bielho de San Pedro. No die Santa Lhuzie, 13 de Dezembre, yá el, la galdrapa i ls sous “ninos”, sacuoden l sossego de la tierra, pedindo smola an alegre i anfenita ringalheira. Ls “mardomos” ban atrás deilhes cun sacos, cestos i até un cántaro para recibir las oufertas. An tiempos idos recebien tamien pan i carne de cochino, mas hoije ye quaije solo denheiro.
Na madrugada de l die 26 de Dezembro – i apuis no purmeiro de Janeiro – sale l chocalheiro de Bumposta. Cuorre pu las rue dando brincotes zaforados mas chenos de bida i d’einergie, metendo-se cun la giente, assustando i pintando las pessonas, subretodo las rapazas. De l lhado dreito de la máçcara bei-se ua salamanquesa grabada. Segundo la sue natureza demonhíaca, apresenta-te tamien uns grandes cuornos i, na punta deilhes, stan spetadas dues laranjas. No cinto, trai chocalhos que ban rugindo anquanto cuorre i brinca. No braço squierdo, uma cesta de castanhas cozidas qu’oufrece a las pessonas que le dan smolas. Na mano dreita, ua einorme tanaç de ferreiro para roubar las tchouriças. De ls queixos, cai-le ua barbica i, al redor de la cintura, ua grande culuobra!
Saliran apuis l Carocho de Custantin, no dia 27 de Dezembro, la bielha de Bila Chana i l farandulo de Tó, die purmeiro de Janeiro. Saliran tamien l bielho ou diabro de Vale Porco, mas tamien l careto de Valverde i l chocalheiro de Bruçó, no cunceilho de Mogadouro, estes yá zaparecidos no sorbedouro de ls tiempos.
Todas estas personaiges son spressones comunitairas i coletibas de cosmobisones arcaicas, que muitas bezes l cristianismo stigmatizou mas que, an muitos causos, s’ancóntran hoije armanadas cun ls sous próprios ritos: l Natal i las fiestas de l Nino, son disso eisemplo. Personaiges que carrégan cun eilhas la nória de l tiempo que mos lhieba al fondo desse poço donde mana la nuossa eidentidade. Mensaiges benidas de l fondo de l tiempo, mas subretodo l cordon umbelhical que mos anlhaça cun esses bibires ancestrales que dan spessura al nuosso bibir i a la nuossa cultura. Mas disso falaremos no próssimo testo.