La pruma braba
Ser mirandés (2)
L patrimonho ye ua hardança de l passado que nós aprobeitamos hoije i que deixamos a las giraçones feturas.
UNESCO
L patrimonho ye, eitimologicamente, la tierra de ls pais. Ye aquilho que ls nuossos antepassados cunserbórun i mos deixórun, para que mos lhembremos deilhes ou para que sábamos cumo fui la sue bida. Ye ua hardança que se trasmite d’ua giraçon a outra an que nós tamien fazemos parte dessa cadena.
Muitas bezes se pregunta para quei sírben alguas cousas, que yá nun s’úsan ou julgamos séren cousas de l passado. La berdade ye que l feturo ye siempre un buraco sin fondo i l presente ua cousa passageira que debrebe resbala pa l passado. Por isso, l nuosso patrimonho ye todo l que sabemos de nós, la nuossa marca i aquilho que guardamos. Esta marca ye la nuossa lhuç na nuite de l tiempo. La lhuç que mos alhumbra i mos guia. L patrimonho represénta-mos cumo pessonas, cumo grupo, cumo sociedade, cumo comunidade. Fai cun que mos síntamos difrentes i únicos. Ye la nuossa eidentidade, l nuosso ADN coletibo.
No causo mirandés, fázen parte desse patrimonho ls saberes adonde se mistúran la música, la lhiteratura oural, las manifestaçones chamadas “folclóricas”, ls meios i las técnicas que dórun cuorpo a la bida tradicional nas sues múltiplas i quaije anfenitas calatrizes, nos miedos, nas crenças, nos saberes qu’ajudórun a criar i a dar cuntinidade al sentimiento de comunidade. Ou seia, a dezir “you sou mirandés”.
Mas, muitas bezes, quien mais i melhor defende l patrimonho nun son ls sous hardeiros, mas quien ben de fuora, pessonas ou grupos que, de maneira paternalista ou nó, defénden aquilho qu’an teorie nun ls pertence. Por outro llado, outras bezes, solo mos lhembramos qu’el eijiste quando l bemos amenaçado. I esta ye outra de las cuntradiçones de l patrimonho: ye que solo ampeçamos a dar-le balor quando mos damos de cunta de que el stá an peligro, quando bemos que ye preciso guardá-lo i deixá-lo a las giraçones feturas. Ou seia, quanto mos damos de cunta que stá quaije çquecido ye que bamos a saber desses traços de la nuossa eidentidade coletiba.
Mas se por patrimonho antendemos ua hardança a que damos balor, el ye tamien l meio donde bibimos, la maneira cumo miramos para la rialidade material ou eimaterial. Ye conhecer i pensar subre l home no lhugar adonde bibe, saber quales son i adonde se stríban ls sous balores. Ye, pois, ua senara mui grande cun staias adonde puoden trabalhar todas las chamadas Ciências Houmanas. Ye destes lhabores múltiplos que poderá salir mais algua lhuç subre l’eidentidade, pois ye a partir de l patrimonho que l’eidentidade se produç. Ls miembros d’ua comunidade eidentefícan-se, ou seia, reconhécen-se an redor de referentes comuns, símbolos que son ls eilementos patrimoniales.
L gusto pul que ben de fuora nun puode scunder l que ye nuosso, l meio natural, cultural ou mesmo religioso, las hardanças, la música, las danças i la nuossa lhéngua. Nun tiempo an que l’eigualdade planetária arrastra cun eilha la dibersidade, la cuncéncia d’ua stória i d’ua ardança comun ─ símbolos eidentitários i marcas de l patrimonho ─ ye ua fiança pa l feturo. L’eidentificaçon cun un lhugar, ua tradiçon, cun ls usos, cun l passado, ye outra garantie para quien nun se cuntentou de bibir solo cun tener pan.
P.S. Por anganho, parte de l purmeiro parágrafo de l miu último testo saliu ancumpleto. Por isso, eiqui queda cumpleto: “Eidentidade ye ua de las palabras de la moda. Nó tanto cumo las palabras “crise”, “ousteridade”, “troika” ou “antroicado” mas, por cierto, cumo “crise d’eidentidade”. Mas antes de falar deilha tenemos de definir dues eideias mais adelantradas: eidentidade andebidual i eidentidade coletiba.”
