A opinião de ...

La pruma braba

Saquei la máçara i mirei-me al speilho . —
Era l nino d’há quantos anhos.
Nun habie demudado nada…
Ye essa la bantaige de saber tirar la máçcara.

Álvaro de Campos

Quei quieren dezir todas essas figuras que nas nuossas tierras sálen a la rue por estas alturas de l anho? Quei se sconde atrás dessas máçcaras? Dónde bénen? Quei quieren dezir todos aqueilhas cousas qu’uas i outras traien agarradas a las máçcaras i a las andumentairas? Eiqui quédan mais alguas achegas pa l muito qu’hai scrito subre estas manifestaçones. Mas queda subretodo la certeza (i la proua) de saber qu’eilhas inda stan bibas an muitas de las nuossas tierras.
L purmeiro que podemos dezir ye que todas eilhas son personaiges funcionalmente mui armanas. Ou seia, todas se maniféstan nas tradicionales máçcaras de madeira i nas posturas de dezórden que fázen ou an que partecípan. Nas máçcaras, representando figuras tauromórficas, stan grabadas serpientes i salamanquesas que, nalguns causos, le sálen de la boca, dando la bulta a la cara i al cachaço i salindo apuis mesmo an ne meio de la tiesta.
La sue simbologie stá, por cierto, armanada cun l touro mas tamien, d’ua maneira mais giral, cun l matcho, cumo símbolos ouperatibos de l poder fecundante.
La culuobra ou serpiente ye l símbolo fálico, de la fecundidade i subretodo de l renascimiento. Criatura qu’heiberna, que muorre i renace ciclicamente, ye l’alegorie de l’eimortalidade que l’oufrece l’eiterna recriaçon. Por outro lhado, deixando todos ls anhos la piel bielha – eiqui tchamada de forma metafórica, houmanizada i feminizada, la “saia” – mais deixa subressalir l sou carátel d’eiterno renuobo.
Criatura de l’einfierno ye tamien la salamanquesa, a quien ls antigos atribuien terribles qualidades benenosas i la capacidade de rejistir al fuogo adonde bibirie. Por isso, tamien eilha partecipa desse carátel regeneratibo, cumo símbolo de la bida que se repite i s’eiterniza. Las colores bibas stan bien presentes nas laranjas que l chocalheiro de Bumposta lhieba spetadas nos cuornos i la sécia de Tó carrega cumo anfeite. Nun tiempo an que la tierra s’apresenta sien bida i quaije muorta, represéntan la bida, tal cumo las castanhas i ls bulhacos s’ancóntran, naturalmente, armanados cun la muorte. Símbolo de la morte ye tamien l negro, que mos aparece seia n’andumentaira seia na cara anfarruscada cun carbon. Outras vezes, estes rituales de passaige gánhan çclaradamente un carátel de cuntraste antre l bielho i l nuobo, de que la tchamada “fiesta de la bielha i de l nino”, an Bila Chana, ou la “fiesta de l santo menino”, an Tó, deixan antender, por antre ua clara nubrina de re-anterpretaçones cristológicas.
La sue ambibalênça trai-mos ls ecos de la fin de l mundo, de mitos antiquíssimos de l anho bielho que s’acaba, a la par de ls ritos de l renuobo, de las crenças n’anho ou no tiempo nuobo, bisto cumo cíclico i renubable. Talbeç benga d’un tiempo a que la grande-mai, dibinizaçon panteísta de las capacidades matriciales de la tierra, i las fuorças celestres, spressones múltiplas ou ounificadas de ls poderes fecundantes de l cielo, bibien inda an harmonie, que ls tiempos seguintes fuoran apartando, mas que pardura eimanente n’anconsciente coletibo de las gientes de l Nordeste Stramuntano.

Edição
3454

Assinaturas MDB