La pruma braba
Diabo - Nun hai einfierno.
Bruxa - Hai einfierno hai.
- Nun hai.
- Hai.
A.B.A., Cuntas de la Tierra de las Faias
No próssimo die 29 de Maio, an Picuote, será apresentada la segunda eidiçon de las mies Cuntas de la Tierra de las Faias. Tráta-se d’ua eidiçon acrecentada cun alguns heiróis que se bénen a ajuntar a aqueilhes que yá andában nesta tierra de suonhos i de mistérios. Eiqui queda l ampercípio d’ua dessas stórias, cun dous desses personaiges, l diabo i ua bruxa, sacados de la cunta “L diabo que nun acreditaba n’einfierno”.
“Era ua beç ua nuite d’Abril i ua manhana cansada i frie. Habie tamien ua bruxa spierta, mui spierta, i un diabo buono. Nesse die la bruxa lhebantou-se cedo, mui cedo, quando la manhana inda staba ambrulhada cun la nuite i l diabo nien sequiera sunhaba cun l die. Ancuntrórun-se ls quatro cumo eiqui se cunta, sien tirar nien poner, nien nada acrecentar. Nun era nien de nuite nien de die, nien a la hora de l meio die. Era an ne tiempo an que todo acuntece sien nada se ber i pouco se saber.
Apuis que las mantas la botórun fuora de la cama, la bruxa passou ua mano molhada pu ls uolhos de la cara, l suferciente para se sentir fresca, i botou la nariç de fuora de casa. Indas que mal se bisse, l fresquito de la manhana i la cisca galhega yá deixában adabinar un die zbulhado i quaije primaberil. Debagarico i sien muita priessa, l Eimbierno alhá iba salindo. Acunchegába-se a las nuites, inda grandes i frescotas, teimando contra las purmeiras campaninas i pies de burro que sálen a saber de l sol an nes balhes mais calientes i soalheiros. Ye tamien por estas alturas que las alrabaças i merujas s’ínchen de coraige i se bótan fuora, ponéndose a nadar an ne meio de l’auga mais fresca de ls rigueiros. L sou tapete berde ye tan spesso que até dá ganas d’un alhá se rebulcar.
Nalguns sítios aparécen tamien uas floricas brancas i amarielhas, de que naide sabe l chamadeiro, mas que inda assi acá bénen todos ls anhos, solo pul prazer i para cumprir la secreta misson d’angalanar ls rigueiros.
Metiu na boca ua códea de pan, anchiu la algibeira de figos secos, i cun tantas magicaçones quaije nien se daba de cunta que las últimas casas de l lhugar yá quedában para trás. Tenie l passo siempre tan libaral qu’angulhie las leugas cumo quien sorbe un jarro de bino nuobo. An ne braço dreito balançaba la cestica de siempre. Era de scobas bien zbulhadas i de brime de l mais branco que se puode maginar. Drento deilha staba la faquita que l ferreiro sou bezino le habie purparado yá iba para un bun par d’anhos.
Todo isto serbie para apanhar yerbas i yerbicas. Cumo sue mai le habie ansinado, cada ua i cada parte debe ser apanhada quando tem mais malzina. Las yerbas para chá i cozidura ye antre las caliendas d’Abril i de Júlio. Apuis, até Outubre, son ls peçpieços que ténen mais birtudes. De Outubre a Abril son las raízes que ténen mais fuorça. Cun eilhas purparaba chás i malzinas para curar alguns males deste mundo.
Mas nun era solo por isso que se lhebantaba cedo. Ye que las árboles bíben de nuite. Quando las streilhas se alumian ye quando eilhas çpértan para buéren de la lhuç que cai de l cielo. Ye ua cousa que nun se puode ber mas ye assi mesmo. S’assi nun fura para quei serbirie la nuite? Toda la giente sabe que ye a la purmanhana, quando la calor i l sol inda nun chegórun, que se dében colher. Ye nesta altura qu’eilhas stan mais chenas de l lícaro bital.
Todas las árboles i yerbas ténen malzina, mas ye nesta altura que dében ser apanhadas. Se la malzina se fai cun las semientes, ye siempre melhor apanhar la yerba fresca, assi l chá sal mais fuorte porque l cheiro tamien cura.”
