La Pruma Braba
Bola l tiempo i sien mexer las alas.
Adaige mirandés
Medir l tiempo fui ua preoucupaçon, mas adabiná-lo fui outra que troixo muito mais cobradeiros de cabeça.
Anquanto l home bibiu daquilho que la tierra daba, l amportante éran las staçones, l friu, l’auga ou la niebe. Por isso, medir las horas de sol i de trabalho era suferciente. Ls reloijos de sol fúrun assi ua de las medidas de l tiempo. L’outra fui l’auga. Esta dou ourige a la palabra grega “clepsidra”, apuis retomada an lhatin. La forma cumpon-se de dues palabras, l eilemento berbal “clepto” (roubar, scunder), i l eilemento nominal “hydôr” (auga). Por isso, indas que las “clepsidras” mais antigas béngan de l Eigito, de 1300 ou mesmo 1440 a.C., hai quien diga que l nome grego le fui puosto pu ls adbogados que se queixában qu’esses aparatos les roubában l tiempo que tenien para defender ls sous clientes.
Las horas de sol, l’auga i l’arena fúrun, durante seclos, las medidas ounibersales de l tiempo. Outros, cumo Afonso X, l sábio, usában candeias ou lhámpadas d’azeite. Mas ls purmeiros a tener ua máquina para medir l passar de l tiempo nun fúrun ls reis, fúrun ls monges que precisában de conhecer las horas de las rezas. Por isso, ls purmeiros reloijos fúrun ls çpertadores, que nun mostrában las horas mas que las dában cun las campanas. L “horologia excitatoria” serbie para que l monge soubisse las horas an que tenie que çpertar, habendo mesmo l guardian de l reloijo – “custos horologii” – qu’era l monge que guardaba l aparato çpertador. Mas estes reloijos solo dában las horas de las rezas que, naturalmente, bariában segundo ls usos i la regras de cada órden.
Ls reloijos modernos habien de demorar muito a chegar. Fui preciso sperar até l seclo XVI, até qu’un tal Galileo Galilei, mirando par’ua lhámpada, se disse de cunta daquilho que quedarie conhecido cumo l’eisocronie de l péndulo. Ou seia, la duraçon de l sou balanço nun se debie a la sue amplitude, mas si al cumprimento de l própio péndulo. Esta çcubierta fizo que l Tiempo nun fusse solo ua medida para saber las horas de las rezas ou de l trabalho, mas ua medida ounibersal.
Adabinar l tiempo fui outra de las cousas que l home siempre quijo fazer. Nas andanças de ls reloijos, Santo Agustino fui de ls purmeiros a lhebantar la boç contra aqueilhes qu’acreditában n’astrologie i nos diuses que, segundo el, tirában al home la respunsabilidade i la libre scuolha que ten que fazer. Na sue grande obra, “La cidade de Dius”, lhuita contra ls astrólogos i contra aqueilhes qu’acreditában tener l sou çtino feito pu ls astros i nó pu la buntade debina.
La çcusson subre l poder de l astros stendiu-se durante toda l’Eidade Média, cun San Tomás d’Aquino a dezir que se ls astros ténen muita amportança, la lhiberdade houmana stá an ser capaç de rejistir a esta anfluença. Mas outros teólogos defendien l cuntrairo, dezindo, por eisemplo, qu’habien sido ls astros a anunciar l nacimiento de Jasus i tamien a andicar l camino als trés Reis Magos.
Seia cumo fur, la berdade ye que la créncia nos astros i n’astrologie chegou als nuossos dies. Mesmo quien nun acredita diç muitas bezes que tubo un die “zastrado”. Ora la palabra “zastre” (pertués “desastre”) cumpon-se de sufixo dis- (separaçon) i astro (streilha). An lhatin, la palabra querie dezir l fenómeno astronómino an qu’un cuorpo celestre se çcumponie ou se spargie an mil direçones até zaparecer de la bista. Cumo l’astrologie armanaba las fuorças i la bida de ls astros cun aquilho que se passaba na tierra, pensába-se qu’estas zórdenes adabinában zbinturas ou zgrácias. Assi chegórun até nós palabras cumo “zastrado” ou “zastre”, qu’usamos sien mos dar-mos de cunta l que berdadeiramente quieren dezir.
