La pruma braba
Que las cousas ténen eidentidades neilhas própias.
Enesidemo.
Bai eiqui para uns tiempos pedírun-me que screbisse algua cousa subre la “faca de Palaçuolo”. Se bien me lhembra, cumo dirie Nemésio, l testo serbirie para houmenagear essa tierra que ye un eisemplo de zambulbimiento. Na altura screbi un pequeinho testo mas, que you saba, nunca chegou a ser publicado porque na rebista a que se çtinaba nun tubo cuntinuidade. Todo esso quedou çquecido até que calhou un die destes antrar n’uas de las fábricas de facas de Palaçuolo. Fui l suferciente para me lhembrar dessas palabras qu’eiqui bos deixo pois me parece que son i seran atuales.
“Hai cousas que se tórnan marcas i símbolos que son eilhes mesmos la marca. La faca de Palaçuolo ye un desses eisemplos. Porquei?
Porque sien nunca s’apartar de l sítio donde naciu nien de la tierra donde ye feita se tornou n’ua marca eidentitária de Palaçuolo i de la tierra de Miranda. I porque l’eidentidade, seia andebidual seia coletiba, ye aquilho que mos possibilita, al lhargo de l tiempo, sermos ls mesmos sendo outros. Neste sentido, la faca de Palaçuolo ye fiel a las sues raízes, mas ye siempre diferente, renuobando-se. Criando nuobas formas, nuobas serbinties, la faquita de Palaçuolo stá siempre alhá, mostrando-se nas sues bárias formas, atrás de las quales se deixa adabinar l génio de quien la criou i l rostro de l home mirandés.
Na sue forma mais antiga, tradicional, la palaçuola apresénta-se cumo un cuorpo eilegante, no sou cabo de madeira doce i agradable al palpar, ua fuolha fina, pronta a cortar ou a afilar l que fur preciso.
Dízen alguns que parte de l segredo de la finura de l sou corte stá na sue outelidade para çcascar patatas, ancuntrando alhá ua sustáncia qu’ajuda la fuolha a aguçar-se. Berdade ou mintira, ou solo fruito de la maginaçon, l cierto ye que las palaçuolas raramente s’acában, siempre rejistentes i fieles, renacendo mesmo quando la fuolha se bai acabando fruito de l uso. Nacida de l fogo i pul fogo, ye ua spécie de fénix, cun la fuorça i durabelidade a tornáren-se nun de ls alheçaces eidentirários que scóran la nuossa tierra.
Ye que las frunteiras eidentitárias nun s’acában no termo de la felegresie. Sténden-se pu la Tierra de Miranda – la mesma qu’iba de Lhagoaça até Outeiro – i ándan de manos dadas cun todos ls stramuntanos que, na buona tradiçon ancestral, ténen la sue palaçuola cumo cumpanheira fiel, andispensable i çtintiba de las oucasiones de felecidade.
Datrás, la palaçuola andaba no bolso i mostrába-se nas fiestas, nas pándigaas, mas tamien nas comidas de carátel comunitairo cumo las matáncias ou aqueilhas que se seguien a alguns trabalhos agrícolas. Fui eiqui qu’eilha criou las sues raízes. Mas hoije an die acupa yá outros lhugares. Demudou-se, afizo-se a outras rialidades, soubo acumpanhar l tiempo, sendo moderna i sendo tradicional. Yá nun sirbe solo para çcascar patatas nien para cortar l pan cun la tchitcha. Sénta-se a la mesa, acumpanha la subremesa, dá bida i dá color.
Mas atrás de cada cousa nuoba stará siempre la palaçuola. Re-ambantada i renacida. Tráta-se, an fin de cuntas, d’un segredo que ten tanto de conhecido cumo de scundido: l’anteligéncia para lidar cun l nuobo, la capacidade de renuobar.
Todas estas ténen sido la culidades de ls ampresários i oubreiros qu’an Palaçuolo, atrabeç de giraçones, mos ténen presentiado cun la cuntinidade deste oubjeto singular. Por isso, eiqui cabe este lhoubor a quien, na forma d’un oubjeto, ajuda al zambulbimiento de la nuossa tierra i a mantener biba la lhuç eidentitária que mos armana i mos diferença.”
